सरस्वती ढकाल-मनोरञ्जन शर्मा, कारोबार दैनिक, शुक्रवार, माघ २६, २०७४
काठमाडौं-भैरहवा-भैरहवास्थित विशेष आर्थिक क्षेत्रमा उद्योग सञ्चालन गर्न प्रक्रिया अगाडि बढाएका कम्पनीहरूमध्ये निर्धारित समयभित्र झन्डै आधामात्र सम्पर्कमा आएका छन् । उद्योग स्थापनाका लागि प्रारम्भिक सम्झौता गरेका १९ मध्ये ११ उद्योगले मात्र सम्झौताका लागि आवेदन दिएको विशेष आर्थिक क्षेत्र विकास समितिले जानकारी दिएको छ । अन्य उद्योगका लागि पुनः १५ दिनको समय दिएर सम्झौतामा आउन सूचित गरिने जनाइएको छ ।
समितिका अनुसार उद्योग सञ्चालनका लागि निर्धारण गरिएको पहिलो चरणको समयावधि बुधबार सएिको छ । सेजमा अन्य भौतिक पूर्वाधार निर्माण भए पनि लामो समयदेखि विद्युत्को सुनिश्चितता हुन नसक्दा उद्योगहरू अलमलमा छन् । प्राधिकरणले विद्युत् दिने ग्यारेन्टी गरेपछि भने सेज समितिले सूचना जारी गर्दै सञ्चालन सम्झौता गर्न उद्योगीहरूलाई आग्रह गरेको हो । समितिका कार्यकारी निर्देशक चण्डिका भट्टले शुक्रबार पुनः सूचना जारी गरी १५ दिनको समयअवधि थप्न लागिएको जानकारी दिए । “थपिएको समयभित्र सबै उद्योगले दर्ता नगरे नयाँ उद्योगका लागि पुनः प्रस्ताव आह्वान गरिनेछ भने पुरानो सम्झौता खारेज हुनेछ,” भट्टले भने ।
सेजभित्र सवै उद्योग सञ्चालनमा आउँदा ५ अर्ब रूपैयाँ लगानी हुने र २ हजारले प्रत्यक्ष रोजगारी पाउने उनले बताएका छन् । सम्झौता भएको सात दिनपछि सञ्चालन अनुमति सेज व्यवस्थापन दिने भन्दै त्यसपछि उद्योग सञ्चालनमा जाने उनले बताएका छन् । सम्झौता भएपछि सेजमा सञ्चालन हुने उद्योगले प्रतिबर्गफिट २० रूपैयाँका दरले भाडा तिर्नुपर्छ । बढ्दो व्यापारघाटालाई सेज ऐनले केही हदसम्म भए पनि सहयोग पुयाउने अपेक्षा गरिएको छ । रूपन्देहीको रोहिणी गाउँपालिकामा ५२ विघा क्षेत्रफलमा रहेको सेजमा १४ सयदेखि ३७ सय बर्गमिटरसम्मका ६९ ओटा प्लट छन् । त्यसमध्ये उद्योग सञ्चालन र उद्योग स्थापनाका लागि ‘एमओयू’ गरेका १९ ओटा उद्योगले ५९ ओटा प्लटको माग गरेकोमा ११ वटा उद्योग मात्रै आवेदन दिएमा उनीहरूको ३० वटा प्लट अर्थात ७० हजार बर्गमिटर क्षेत्रफल प्रयोग हुनेछ ।
समितिका प्रवक्ता सुन्दर थापाले केही नयाँ उद्योगले चासो देखाएको जानकारी दिएका छन् । पहिले समझदारी भएका उद्योगहरू पनि थप गरेको समयभित्र सञ्चालन आवदेन दिन आउनसक्ने भन्दै नआएको अवस्थामा नयाँ प्रक्रिया सुरु हुने उनले बताए । समझदारी भएर पनि सञ्चालन सम्झौतामा नआएका बाँकी ८ वटा उद्योगहरूले ३० देखी ३५ वटा प्लट लिएका छन् । अहिले पञ्चकन्या लगायतका उद्योगले धेरै प्लट मागेकोले सेजमा उद्योगीहरूको आर्कषण भएको प्रवक्ता थापा बताउँछन । उनले सेजभित्र खाद्यउद्योग, कृषिजन्य, हर्बल प्रोडक्ट, छालाको वस्तु, तयारी पोसाक, हस्तकला, धातु तथा प्लास्टिक उत्पादन गर्ने उद्योगलाई प्राथमिकता दिइने बताए । ती उद्योगले ७५ प्रतिशत उत्पादन निर्यात गर्नुपर्ने प्रावधान छ ।
हाल उद्योग सञ्चालनको अनुमतिका लागि निवेदन नबुझाउने कम्पनीमा जगदम्बा, गोल्छा, अरुणखोला वहुउद्देश्यीय सहकारी, चेतनशील मल्टिपर्पाेजलगायत रहेका छन् ।
सेजमा उद्योग स्थापनाका लाण्गि अनुमति माग गरेका सिद्धार्थ गु्रपका निर्देशक राजेशकुमार अग्रवालले आफूहरू निकै उत्साहित रहेको भन्दै छिटोभन्दा छिटो सेजभित्र आवश्यकताअनुसारको विद्युत् उपलब्ध गराउन आग्रह गरे । उद्योगीहरूको करोडौं लगानी हुने र देशकै पाइलट प्रोजेक्टका रूपमा भैरहवा सेज रहेकाले जसरी भए पनि यसलाई सफल बनाउनुपर्ने अग्रवालको भनाइ छ । प्राधिकरण भैरहवाका प्रमुख मुनिन्द्र ठाकुरले सेजभित्र सवस्टेसन छिटै नै बन्ने जानकारी दिए । तत्काल दुई मेगावाट र चैतभित्र १० मेगावाट विद्युत् सेजमा दिन सकिने ठाकुरले बताए ।
|
सञ्चालन सम्झौताका लागि आवेदन दिएका उद्योग |
स्रोत: karobardaily.com/news/corporate/2250
