News

अर्थतन्त्र सुधारोन्मुख

May 29, 2017

The Annapurna Post, Menuka Karki, 29th May 2017, Kathmandu

मौसमी अनुकूलता, पुँजीगत खर्चमा भएको वृद्धि, ऊर्जा व्यवस्थापन, लगानीमैत्री वातावरणका कारण यस वर्ष देशको अर्थतन्त्र सुधारोन्मुख देखिएको छ । अर्थतन्त्र बलियो बन्दै गएपछि नेपालको अर्थतन्त्रको आकार साढे तीन खर्बले ठूलो भएको छ भने आर्थिक वृद्धि विगत २२ वर्षयताकै उच्च हुने देखिएको छ ।

साधारणतया ५/६ प्रतिशतको मूल्यवृद्धिलाई साधारण मान्नुपर्ने राष्ट्रको भनाइ छ । आपूर्ति व्यवस्थापनमा आएको सहजताका कारण यस वर्ष मूल्यवृद्धि सामान्य रहने देखिएको छ । यसको मतलव नेपालको अर्थतन्त्र विस्तारै सकारात्मक बाटोतिर धकेलिँदै छ भन्ने हो ।

आर्थिक वृद्धिका हिसाबले यस वर्षलाई उत्साहजनक मान्नुपर्छ । देशमा अर्थतन्त्रका गतिविधि बढेसँगै यसको प्रत्यक्ष प्रभाव प्रतिव्यक्ति आयमा परेको छ । गत वर्षको भन्दा एक सय पाँच डलरले नेपालीको आय बढेको छ । गत वर्ष भूकम्प तथा ६ महिना लामो सीमा नाका बन्द तथा प्रतिकूल मौसमका कारण नेपालको अर्थतन्त्र डामाडोल थियो । गत वर्षको आर्थिक सर्वेक्षणले शून्य दशमलव ७७ प्रतिशत आर्थिक वृद्धि हुने अनुमान गरे पनि यथार्थमा भने शून्य दशमलव शून्य एक प्रतिशत मात्र आर्थिक वृद्धिदर भएको छ ।

अर्थतन्त्रमा मुख्य आधार मानिएको प्राथमिक क्षेत्रको योगदान बर्सेनि घट्दै गएको छ भने द्वितीय क्षेत्र पनि प्राथमिक क्षेत्रको पछिपछि लागेको आर्थिक सर्वेक्षणले देखाएको छ । अर्थतन्त्र निर्माणमा थोरै हिस्सा ओगटेको द्वितीय क्षेत्रको योगदान गत वर्ष ऋणात्मक रहे पनि यस वर्ष माथि उठ्न थालेको छ । नेपालको अर्थतन्त्रमा सबैभन्दा ठूलो हिस्सा तृतीय क्षेत्रले लिएको छ । पछिल्ला वर्षमा कुल गार्हस्थ उत्पादनमा सेवा क्षेत्रको योगदान बढेसँगै नेपालको अर्थतन्त्रमा संरचनागत परिवर्तन आएको छ ।

बजेटको आकार बढेसँगै खर्च गर्ने क्षमता वृद्धि गर्न नसके पनि राजस्व असुली भने मनग्य भएको आर्थिक सर्वेक्षणमा उल्लेख छ । बजेट स्रोतमा राजस्वको हिस्सा उल्लेख्य रूपमा बढेको छ । देशको अर्थतन्त्रलाई सवल बनाउने तथा रोजगारी सिर्जना गर्ने पुँजी खर्च उत्साहजनक रूपमा बढ्न नसके पनि यो विस्तारै बामे सर्दै अगाडि बढिरहेको छ ।

देशमा उद्योगधन्दा विस्तार हुने क्रम बढ्दो अवस्थामा छ । सरकारी र निजी दुबै क्षेत्रको लगानीमा वृद्धि भएको छ । कुल राष्ट्रि«य र गार्हस्थ बचत दुबै बढेको छ । यति हुँदाहुँदै पनि उच्च, दिगो, फराकिलो र समावेशी आर्थिक वृद्धिमार्फत देशमा व्याप्त गरिबी, असमानता, बेरोजगारी तथा परनिर्भरता अन्त्य गर्न भने सरकारलाई चुनौती छ ।

उद्योगधन्दा विस्तार हुने क्रम बढ्दो छ । सरकारी र निजी दुबै क्षेत्रको लगानीमा वृद्धि भएको छ । कुल गार्हस्थ बचत बढेको छ ।

Source: http://annapurnapost.com/news/71927