News

असार १ देखि खुलेको कोरला नाका बन्द, राजस्व असुली दोब्बर

June 27, 2017

बिनोद त्रिपाठी, कान्तिपुर दैनिक, १३ असार २०७४ 

नेपाल–चीन कोरला नाकामा सञ्चालित मेलामा किनमेल गर्न आउनेको संख्या यसपालि गतवर्षको तुलनामा दोब्बर पुगेको छ । किनमेल गर्ने व्यापारीको संख्या बढेकोले राजस्व असुली दुई गुनाले बढेको भन्सार कार्यालयले जनाएको छ ।

यही असार १ देखि खुलेको नाकामा पुगेर नेपालतर्फका व्यापारी र सर्वसाधारणले सामान किनेर ल्याएका थिए । व्यापारीलाई आवश्यकबमोजिमका सामान खरिद प्रक्रिया सकिएकोले आइतबारदेखि कोरला नाका बन्द गरिएको भन्सार प्रमुख शुक्रदर्शन ढुंगानाले जानकारी दिए । ‘अब मागबमोजिम फेरि भदौमा नाका खोल्न सकिन्छ,’ उनले भने, यसपालि सामान खरिद गर्नेको संख्या गतवर्षको तुलनामा दोब्बर वृद्धि भयो ।’ यो पटक ६ लाख ४१ हजार राजस्व असुली भएको उनले जानकारी गराए । ‘हामीले लक्ष्य ५ लाख गरेका थियौं’ उनले भने, 'लक्ष्यभन्दा बढी राजस्व महसुल उठ्नुमा सामान आयात वृद्धि हुनु नै हो ।’ गतवर्ष यस्तै खालको मेलामा ३ लाख २७ हजार राजस्व उठेको थियो । भन्सार महसुलमा कडाइ र व्यापारीको संख्या बढेकोले राजस्व उठतीमा वृद्धि भएको उनले बताए । यो नियमित सञ्चालन नभएको नाका भएकोले भन्सार महसुलको नीतिगत प्रक्रिया खुकुलो थियो, तर यसपालि अघिल्लोपटक भन्दा केही परिवर्तन गरेर महसुल उठाउने काममा कडाइ गरिएको उनको भनाइ छ । 

नेपालका व्यापारीलाई सामान खरिद गर्न चीनका स्थानीय अधिकारीले दुवै देशको सहमतिमा वर्षको दुई पटक नाकाको गेट खोलेर यहाँ मेला लगाउने गर्दे आएका छन् । मेला सिमानाबाट १५ किमि चीनतर्फको भूभागमा अवस्थित खुल्ला चौरमा लाग्ने गर्छ । चीनको ढुंग्वासेन बजारका व्यापारीले यही चौरमा सामान ल्याएर राख्ने गर्छन् र यही किनमेल चल्दै आएको छ । चीनको ढुंग्वासेन बजार सिमानाबाट ३० किमि टाढा पर्छ । यो बजार पोखरा सहर जत्रै ठुलो रहेको छ । यहाँबाट चीनको अर्को ठुलो सहर सिगात्से ६ सय ५० किमि टाढा पर्छ । मोटरबाट सिगात्से पुग्न ३ घण्टा लाग्ने व्यापारीहरु बताउँछन् । मेलामा सिगात्सेदेखि व्यापारीहरुले सामान ल्याएर नेपालीलाइ बेच्दै आएका छन् ।

भन्सार कार्यालयका अनुसार यसपालि पनि निर्यात शुन्य रहेको छ । गतवर्षदेखि चीनका व्यापारीले नेपालतर्फको उत्पादन खरिद गर्न बन्द गरेकोले निर्यात शुन्य भएको भन्सार कार्यालयले जनाएको छ । नेपालको उत्पादन कमसल र गुणस्तरहीन भएकोले त्यहाँको सरकारले नेपालको सामान किन्न बन्द गरिदिएको थियो । पहिले पहिले नेपालबाट फापर पिठो, उनी गलैंचा, पश्मिना, धागो, आलुलगायत कृषिजन्य सामान निर्यात हुने गरेको थियो । अहिले निर्यात बन्द भए पनि चीनको स्थानीय प्रशासनले नेपालीका लागि सामान खरिदकै लागि भए पनि वर्षको दुईपटक कोरला नाका खुलाउने गरेको छ । 

स्रोत: http://kantipur.ekantipur.com/news/2017-06-27/20170627121315.html