News

काठमाडौं उपत्यकाभित्र २८ प्रतिशतले मास्क हातमा झुन्ड्याउँछन् : अध्ययन

August 10, 2020

कान्तिपुर, श्रावन २६, २०७७ 

काठमाडौँ — नेपाल सरकारले जारी गरेको कोभिड-१९ विरुद्ध जनस्वाथ्य मापदण्डको प्रयोग नागरिकस्तरबाट प्रभावकारी ढंगबाट पालना नगरिएको पाइएको छ । कोरोना संक्रमण न्यूनीकरण र रोकथामका लागि सामाजिक दूरी कायम, मास्कको प्रयोग र स्यानिटाइजर र साबुनले पटक-पटक हात धुने कुरा अपरिहार्य हुन् तर  उपत्यकावासीले यसको पालना नगर्ने गरेको एक अध्ययनले देखाएको छ ।

तस्बिरः राेयटर्स

नेपाल स्वास्थ्य अनुसन्धान परिषद्ले ४ हजार ५०२ गरेको अध्ययनमा मास्क लगाउनेको ७२.१ प्रतिशत पाएको छ भने मास्क नलगाउनको २७.१ प्रतिशत पाएको छ । अध्ययनमा मास्क लगाउनेमध्येमा पनि कपडाको मास्क लगाउनेको ७२.३३ प्रतिशत थियो भने नाक मुनि वा चिउँडोमा मास्क लगाउने, घाँटीमा मास्क झुन्ड्याउने , मास्क हातमा झुन्ड्याउने, मास्कको कडा भागलाई नाकको आकारमा नथिचेर लगाउने २७.३४ प्रतिशत थियो ।

काठमाडौँ उपत्याकाभित्र पर्ने २३ वटा सार्वजनिक स्थलहरुमा सर्वेक्षण गरिएको थियो । परिषदले जनस्वास्थ्यका मापदण्ड पालना भएको छ/छैन भन्ने विषयमा व्यक्तिगत तह र संस्थागत तहमा गरी दुई तहमा सर्वेक्षण गरेको थियो ।

उक्त अध्ययन प्रतिवदेन तयार गर्नका लागि परिषदबाट ६ जनाको विज्ञ समूह गठन गरिएको थियो र तथ्यांक संकलनका लागि ३९ जना दक्ष जनशक्तिलाई दुई दिनसम्म परिचालन परिषदले जनाएको छ । सार्वजनिक स्थालहरु जस्तै तरकारी बजार, मल , सरकारी र नीजि अस्पताल, बैँक, मालपोत कार्यालय, मठ मन्दिर, सार्वजनिक यातायात र होटलहरु पनि अवलोनकन गरिएको थियो ।

यी स्थानहरु अवलोकन गर्दा कम स्थलमा मात्र सामाजिक दूरी कायम गरिएको पाइएको थियो । त्यसैगरी मार्किङ गरे पनि ३१.२५ प्रतिशत स्थलमा मात्र सामाजिक दूरीको नियम पालना गरिएको पाइएको थियो । त्यसैगरी साबुन पानी र स्यानिटाइजरको व्यवस्था भने लगभग ६० प्रतिशत स्थलहरुमा मात्रै उपलब्ध थियो ।

अध्ययनले निजी र सरकारी अस्पतालमा अवलोकन गर्दा सामाजिक दूरीका लागि ओपिडी , फार्मेसी, टिकट काउन्टर अगाडि मार्किङ कायम गरिएको थियो तर कुनै पनि अस्पतालको चमेना गृहमा भने सामाजिक दूरी(दुई मिटर) कायम गरिएको नदेखिएको बताउँछ । २० प्रतिशत अस्पतालमा मात्र सामाजिक दूरीको पालना गरेको अध्ययनमा उल्लेख गरिएको छ ।

साथै ३० ओटा सार्वजनिक यातायातमा अवलोकन गर्दा ५० प्रतिशतभन्दा कम यातायातमा मात्र एउटा सिटमा १ जना मात्र बस्ने व्यवस्था मिलाएको र एक सिट छोडेर अर्को सिटमा मात्र यात्रु बस्ने नियम पालना भएको र स्यानिटाइजरको व्यवस्था रहेको थियो ।

स्रोत: https://ekantipur.com/news/2020/08/10/159702918485969026.html