News

खाँदबारी नगरपालिकाको बेरुजु पाँच करोड

March 30, 2018

नवीन गुरुङ, नयाँ पत्रिका, चैत्र १६, २०७४ 

लेखा अधिकृतका नाममा मात्र साढे ७६ लाख बेरुजु

खाँदबारी नगरपालिकाको बेरुजु पाँच करोडभन्दा बढी देखिएको छ । लेखा अधिकृत नवीनकुमार श्रेष्ठको नाममा मात्र झन्डै ७६ लाख ५० हजार बेरुजु छ । बिलभर्पाई पेस नगर्ने अन्य कर्मचारीको नाम भने गोप्य राखिएको छ ।

महालेखापरीक्षकले लेखापरीक्षण गर्ने क्रममा चालू आर्थिक वर्ष यति ठूलो रकम बेरुजु भएको पाइएको हो । लेखा अधिकृत श्रेष्ठलाई बेरुजु देखिएको रकम तत्कालै बैंकमा दाखिला गर्न र स्पष्टीकरण दिन तीन दिनको समय दिएको नगरपालिकाका कार्यकारी अधिकृत कृष्णकुमार निरौलाले जानकारी दिए । अन्य क–कसको नाममा बेरुजु छ भन्ने कार्यकारी अधिकृत निरौलाले बताउन चाहेनन् ।

अरू कर्मचारीहरूको नाममा देखिएको बेरुजुमा पनि श्रेष्ठ नै दोषी भएको निरौलाको दाबी छ । उनले भने, ‘अरू केही कर्मचारीको नाममा पनि श्रेष्ठ आफैँले हस्ताक्षर गर्दै चेक काटेर निकासा दिने गरेको लिखित स्पष्टीकरण प्राप्त भएकाले उनैबाट असुल्नुपर्ने देखिएको छ ।’

मलेपले श्रेष्ठसहित सम्बन्धित कर्मचारीबाट तत्काल एक करोड ३९ लाख रुपैयाँ असुल गर्न निर्देशन दिएको छ । ९१ लाख ९५ हजार रुपैयाँ जम्मा भइसकेको निरौलाले जानकारी दिए । श्रेष्ठको नाममा साढे ७६ लाख बेरुजु देखिए पनि अहिलेसम्म दाखिल भएको सबै रकम उनैले तिरेका छन् ।

नगरपालिकाले बनायो छानबिन समिति
ठूलो रकम बेरुजु देखिएपछि नगर कार्यपालिका बैठकले खाँदबारी नगरपालिका– ५ का कार्यवाहक अध्यक्ष श्यामप्रसाद निरौलाको संयोजकत्वमा तीन सदस्यीय छानबिन समिति बनाएको छ । समितिमा कोष तथा लेखा नियन्त्रण कार्यालय संखुवासभाका प्रतिनिधि रुद्रमणि श्रेष्ठ र जिल्ला समन्वय समितिका प्रतिनिधि रुद्र बुढाथोकी सदस्य छन् । समितिलाई प्रतिवेदन बुझाउन सात दिनको समय दिइएको छ ।

ठूला आयोजना र सामाजिक सुरक्षा भत्तामा बेरुजु
कार्यकारी अधिकृत निरौलाका अनुसार नगरपालिकाका ठूला आयोजना र सामाजिक सुरक्षा कार्यक्रममा धेरै रकम बेरुजु देखिएको छ । सामाजिक सुरक्षा भत्ताको पर्याप्त अभिलेख नभएकाले तीन करोडभन्दा बढी बेरुजु देखिएको निरौलाले बताए । आयोजनाका लागि लगिएको रकमको खर्चको बिल दाखिला नगरेको पाइएको उनको भनाइ छ । छानबिन समितिको प्रतिवेदनपछि मात्र के–कति वास्तविक बेरुजु हो भन्न सकिने उनले बताए ।

पुराना खातासमेत हेरिने
खाँदबारी नगरपालिकामा यसअघि पनि सुशासन नभएको भन्दै धेरै गुनासो हुने गरेको थियो । कार्यकारी अधिकृत निरौलाले छानबिन समितिले आवश्यक ठाने अघिल्ला वर्षको समेत अनुसन्धान गरिने जानकारी दिए । अघिल्लो तीन वर्षसम्मको बैंक स्टेटमेन्ट भने मगाइसकिएको निरौलाले जानकारी दिए ।

दोषीलाई कारबाही हुन्छ
अनियमितता भएको ठहरे नियमअनुसार कारबाही हुन्छ । म अहिले पितृशोकका कारण जिल्लाबाहिर छु । तर, छानबिन समिति बनिसकेको छ । समितिले बुझाउने प्रतिवेदनअनुसार कारबाही गरिनेछ । आवश्यक परे अघिल्ला वर्षको खर्चको पनि अनुसन्धान हुनेछ : मुरारीप्रसाद खतिवडा, मेयर, खाँदबारी नपा

स्रोत: http://www.enayapatrika.com/2018/03/30/35797/