कारोबार आर्थिक दैनिक, १२ माघ २०७४
पछिल्लो समय एक दर्जनभन्दा बढी नयाँ तारे होटलहरू थपिएका छन् भने दर्जनकै संख्यामा पर्यटकस्तरीय होटलहरू पनि थपिएका छन् । नेपालमा एक दशकपछि पाँचतारे होटल पनि थपिएको छ । पर्यटन विभागका अनुसार एउटा पाँच तारे र ६ वटा चार तारे होटल थपिएका छन् । यस्तै, तीनवटा तीन तारे होटल पनि थपिएको पर्यटन विभागका महानिर्देशक दिनेश भट्टराईले जानकारी दिए । पर्यटकस्तरका होटल मात्रै पछिल्लो समय २३ वटा होटल थपिएको विभागमा महानिर्देशक भट्टराईले जानकारी दिएका छन् ।
विभागका अनुसार भैरहवामा सिल्भर हेरिटेज ग्रुपको टाइगर प्यालेस नामक नयाँ पाँचतारे होटल थप भएको छ । यो होटललाई सिल्भर हेरिटेजले विदेशी लगानीको रूपमा भर्खरै नेपाल भित्र्याएको हो । एएटा थपिए पनि दुईवटा पाँच तारे होटल भने बन्द भएका छन् । २०७२ को भूकम्पपछि राजधानीको एभरेस्ट होटल बन्द छ, भने मजदुर समस्या तथा व्यवस्थापनको कमजोरीले पोखराको फूलबारी रिसोर्ट गत साउनदेखि बन्द अवस्थामै छ ।
नेपालमा करिब तीन दशकपछि औपचारिक रूपमा नयाँ चारतारे होटल एकै वर्षभत्र तीनवटा थप भएका छन् । २७ वर्षअघि स्थापना भएको ललितपुरको हिमालय होटलपछि औपचारिक विभागमा दर्ता भएका चारतारे होटलको संख्या पाँच वटा पुगेका छन् । यसअघि दशकौंसम्म चारतारे होटलको रूपमा लाजिम्पाटको शंकर र हिमालयमात्रै रहेका थिए । काठमाडौंभित्र सीमित चारतारे होटल अव राजधानीबाहिर पनि विस्तार भएका छन् । पछिल्लो समय सोल्टीले नेपालगन्जमा चार तारे होटल ‘सोल्टी वेस्टेन्ड प्रिमियम’ सञ्चालनमा ल्याएको छ । पर्यटन विभागले दिएको जानकारीअनुसार सन् २०१६ मा थप भएका तीनवटा चारतारे होटल काठमाडौंबाहिर निर्माण भएर सञ्चालनमा आएका छन् ।
कञ्चनपुरको होटल ओपेरा, नेपालगन्जको होटल कृष्णा र सिमराको होटल इच्छाले पर्यटन विभागबाट चारतारेको अनुमति पाएका हुन् । यसबाहेक मन्त्रालयको सम्पर्कमा आइसकेका र छिट्टै निरीक्षण गरेर स्तर वर्गीकरणपश्चात् चारतारेको मान्यता पाउने होटलमा नेपालगन्जकै सोल्टी सिब्क्रिम, नगरकोटको मिस्टिक माउन्टेन, कोहलपुरको सेन्ट्रल प्लाजासहितका होटल रहेको उल्लेख छ ।
यसबाहेक व्यवसायले विभिन्न माध्यमबाट घोषणा गरेका होटल निर्माणकै चरणमा रहेकोले सम्पन्न भए पनि मन्त्रालयले गर्ने निरीक्षणबाट मात्रै स्तर वर्गीकरण हुने गरेको छ । पहिल्यै चारतारे भनेर निर्माण गरिए पनि स्तर वर्गीकरणपश्चात उक्त होटल तीनतारे हुने गरेको पनि छ । यसअघि ठमेलको होटल मेरिओट चारतारे भनेर निर्माण सुरु गरिए पनि सञ्चालनमा आउँदा तीनतारेको मात्रै स्तर पुगेको पर्यटन विभागको भनाइ छ ।
तीन दशकदेखि नेपालमा चारतारे होटलको संख्या थप हुन नसकेको भए पनि पर्यटन क्षेत्रमा देखिएको सकारात्मक सम्भावना, लगानीको वातावरण बन्दै जानु र दीर्घकालीन लाभको दृष्टिलाई हेरेर नयाँ होटल थप भएको होटल एसोसिएसन नेपाल (हान) का महासचिव विनायक शाह बताउँछन् । उनका अनुसार तीन वर्षभत्रै काठमाडौंमा मात्रै चारतारे होटलमा चार हजार कोठा थप हुँदैछन् । पछिल्लो तीन दशकसम्म एउटा पनि चारतारे होटल नथपिए पनि हाल थपिएका र निर्माणको क्रममा रहेकासहित दर्जन चारतारे होटल आउने तयारीमा रहको पनि शाहले बताए ।
विभागका अनुसार सन् २०१६ मा तीनतारे होटल तीन वटा थप भएका छन् । थपिएका तीनतारे होटलमा ठमेलको १ सय १५ कोठे म्यारिओट, ठमेलकै ६३ कोठे मालवेरी र हेटौंडाको ६० कोठे सामना होटल रहेका छन् । यसअघि ३१ वटा रहेको तीनतारे होटलमा थप संख्यासहित ३४ वटा पुगेको पर्यटन विभागले जानकारी दिएको छ ।
विभागका अनुसार पर्यटकस्तरका होटल भने २३ वटा थप भएका छन् । पर्यटकस्तरका होटल हाल ४ सय ८५ वटा पुगेको उल्लेख छ । विभागले दिएको जानकारी अनुसार दुईतारे होटल भने गत वर्ष थप भएनन् । यस्ता होटलको संख्या ४३ छन् । ६ वटा एकतारे होटल भने निरीक्षणका क्रममा स्तर घटुवा भएर पर्यटकस्तरमा झरेका छन् ।
पर्यटन विभागका अनुसार एकतारेबाट स्तर घटेर पर्यटकस्तरमा पुग्ने होटलमा ठमेलको एक्सेक्सर, होटल बुद्ध, होटल मेलम्ची, होटल गरुडा, होटल शक्ति र ओङपिक रहेको छ । होटल मन्त्रालयको अनुगमनका क्रममा तोकिएको मापदण्ड नपुगेका कारण घटुवा भएका हुन् ।
