News

बिमा कार्यक्रममा सवा लाख महिला सहभागी

November 30, 2017

कारोबार आर्थिक दैनिक, १४ मंसिर २०७४

आर्थिक रूपमा पुरुषप्रति निर्भर रहँदै आएका महिलाहरू सरकारले सञ्चालन गरेको स्वास्थ्य बिमा कार्यक्रममा भने अग्रपंक्तिमा देखिएका छन् । सामाजिक स्वास्थ्य सुरक्षा विकास समितिको तथ्यांकअनुसार गत आर्थिक वर्ष ०७३-७४ को अन्त्यसम्ममा १ लाख २० हजार २ सय ७७ महिला सहभागीले बिमा सदस्यता लिएका छन् ।
तथ्यांकअनुसार गत आवमा २ लाख २८ हजार १ सय १३ जना सहभागी भएका छन् । यो संख्या कुल बसोबास गर्ने जनसंख्याको करिब ५ प्रतिशत मात्रै हो भने कुल विमित संख्यामध्ये महिलाको उपस्थिति करिब ५३ प्रतिशत रहेको छ । त्यस्तै, कार्यक्रममा सहभागी हुने पुरुषको संख्या भने १ लाख ७ हजार ८०५ रहेको छ । प्राविधिकको त्रुटिका कारण ३१ जना भने अन्य समूहमा परेका छन् ।
कार्यक्रम सञ्चालन भएका जिल्लामध्ये बाग्लुङ, पाल्पा, तनहुँ र गोरखामा महिला सहभागी संख्या बढी छ । समितिको तथ्यांकअनुसार बाग्लुङमा १५ हजार ४९५ मानिस कार्यक्रममा सहभागी भएका छन् जसमध्ये ८ हजार ४६५ महिला सहभागी छन् । यो संख्या कुल सहभागी संख्याको करिब ५५ प्रतिशत हो । त्यस्तै, पाल्पामा पनि करिब ५४ प्रतिशत महिला सहभागिता छ । कुल ३९ हजार ६९९ जनाको सहभागीता रहेको पाल्पामा महिला सहभागीता संख्या २१ हजार ४ सय ४४ छ । तनहुँमा भने बिमा कार्यक्रममा ४ हजार ५ सय ५३ महिलाले सदस्यता लिएका छन् । 
नेपालमा तुलनात्मक रूपमा महिलाको जनसंख्या बढी छ । त्यसैले पनि महिला सहभागिता अधिक देखिएको हुन सक्ने समितिका वरिष्ठ जनस्वास्थ्य प्रशासक डा. भुवन पौडेलले बताए । साथै बिमा दर्ता गर्दा परिवारको सदस्य अनिवार्य रुपमा उपस्थित हुनुपर्छ । तर, धेरै नेपाली पुरुषहरू वैदेशिक रोजगारीका लागि घर बाहिर हुने भएकाले पनि पुरुषको सहभागिता कम भएको हुन सक्ने उनले बताए । 
तर, जाजरकोट र बैतडीमा भने पुरुषको संख्या बढी देखिएको छ । बैतडीमा ३ हजार १४० जना मानिस कार्यक्रममा सहभागी छन् जसमध्ये महिलाको संख्या १ हजार ५५६ मात्र छ । यो संख्या कुल सहभागी संख्याको ४९ प्रतिशत हो । त्यस्तै, जाजरकोटमा २ हजार ९ सय २९ सहभागीमध्ये १ हजार ४ सय ५४ महिला सहभागी संख्या छ । 
त्यस्तै १५ जिल्लामा १ हजार २ सय २४ दर्ता सहयोगी खटिएका छन् । समितिले भने दर्ता सहयोगीका लागी १ हजार २ सय ८७ मध्ये छनोट गरेको थियो जसमध्ये ८२ जनाले एउटा पनि बिमा दर्ता गराउन सकेनन् । ५४ जनाले राजीनामा दिएका छन् । ७ जना भने छनौट हुन बाँकी छन् । दर्ता सहयोगीले छ महिनासम्म एक घरपरिवार पनि दर्ता गराउन नसकेकामा निज सँग गरिएको सम्झौता स्वतः खारेज भएको मानिनेछ । सम्झौता खारेज भएकाहरू तथा राजीनामा गरेकाहरूबाट जिन्सी र नगद बुझबुझारथ गराउनुपर्छ ।

स्रोत: https://www.karobardaily.com/news/insurance/610