भन्सार छुटमा ५६ अर्बको सामान आयात

अच्युत पुरी, नयाँ पत्रिका, २२ माघ २०७४

नेपाल सरकारलाई कुल ५१ अर्ब ३६ करोड ४९ लाख रुपैयाँ भन्सार महसुलबापत प्राप्त

आर्थिक वर्ष ०७४/७५ को प्रथम ६ महिनामा ५६ अर्ब ५४ करोड २२ लाख रुपैयाँबराबरको वस्तु आयातमा भन्सार छुट सुविधा प्रयोग भएको छ । यो कुल आयातको १० दशमलव ५७ प्रतिशत हो । सो अवधिमा ५ खर्ब ३५ अर्ब ५ करोड रुपैयाँका वस्तु विभिन्न देशबाट नेपालमा आयात भएको भन्सार विभागको तथ्यांक छ ।

सो वस्तुहरू आयात गर्दा नेपाल सरकारले कुल ५१ अर्ब ३६ करोड ४९ लाख रुपैयाँ भन्सार महसुलबापत प्राप्त गरेको छ । विभागका सूचना अधिकृत शिव भण्डारीका अनुसार सरकारको निर्णयअनुसार नै आयात गरिएका कतिपय वस्तु तथा सामानमा भन्सार छुट सुविधा उपलब्ध गराइन्छ ।

भन्सार छुटमा कस्ता वस्तु भित्रिन्छन् ? 
सरकारले अत्यावश्यक सेवामा प्रयोग हुने वस्तुको आयातमा भन्सार छुट सुविधा दिने गर्छ । साथै स्वदेशी उत्पादनलाई प्रवद्र्धन हुने खालका कच्चा पदार्थको आयातमा पनि भन्सार छुट सुविधा दिइएको हुन्छ ।

मानव रोगको उपचारमा प्रयोग हुने केही उत्पादन, कृषि उत्पादनमा प्रयोग हुने विभिन्न प्रकारका रासायनिक मल, पुस्तक, परम्परागत पात्रो, कपास, दृष्टिविहीनले प्रयोग गर्ने सेतो छडीलगायत वस्तु आयातमा भन्सार छुटको व्यवस्था छ ।

महिलाको सौन्दर्य सामग्रीमध्ये टीका, चुरा, हाडजोर्नीको उपचारमा प्रयोग हुने उपकरण, मानव शरीरका कृत्रिम अंग, कृत्रिम जोर्नीहरूलगायतको आयातमा पनि भन्सार छुट सुविधा उपलब्ध हुन्छ ।

विलासिताका सामानमा भन्सार बढी 
सरकारले विलासिताका सामग्री, स्वास्थ्यमा हानि प-याउने मदिराजन्य पदार्थलगायत मालवस्तु आयातमा बढी भन्सारदर तोकेको हुन्छ । मदिरा आयातमा भने परिमाणका आधारमा महसुल तोकिएको हुन्छ ।

विभागको तथ्यांकअनुसार समीक्षा अवधिमा ३० प्रतिशत भन्सार महसुलदर तोकिएका सामग्री आयातबाट सरकारले सबैभन्दा बढी भन्सार महसुल उठाउन सकेको छ । यस दरमा विभिन्न क्षमताका मोटरसाइकल तथा सवारीसाधन आयात हुने गर्छन् ।

स्रोत: www.enayapatrika.com/2018/02/05/21296/