वाणिज्यको अनुगमन : २० दिनमा ८७ फर्मलाई कारबाही

कान्तिपुर, असार २१, २०७९

काठमाडौँ — वाणिज्य, आपूर्ति तथा उपभोक्ता संरक्षण विभागले बजार अनुगमनका क्रममा २० दिनमा ८७ फर्मलाई कारबाही गरेको छ । असार १ देखि २० गतेसम्म बजार अनुगमनको सिलसिलामा ती फर्मलाई विभिन्न कसुरमा कारबाही स्वरुप कुल २५ लाख ७५ हजार रुपैयाँ जरिवाना गरिएको विभागले एक विज्ञप्तिमार्फत जानकारी गराएको छ । यसबीचमा २७८ फर्मको अनुगमन गरिएको विभागले जनाएको छ ।

चालु आर्थिक वर्षको साउनदेखि असार २० गतेसम्म कुर ३ हजार ३४ व्यापारिक फर्महरुमा अनुगमन र निरीक्षण गरी १ हजार ३०१ फर्मलाई १ करोड ७७ लाख ८१ हजार रुपैयाँ जरिवाना गरिएको छ । पछिल्लो पटक उजुरीका आधारमा पाटन औद्योगिक क्षेत्रको अन्नपूर्ण इन्डष्ट्रिजद्वारा उत्पादित पानीको नमुना संकलन गरी परीक्षण गर्दा पिउन अयोग्य देखिएको जनाउँदै विभागले उद्योगलाई सिलबन्दी गरिएको जनाएको छ ।

स्रोत: https://ekantipur.com/business/2022/07/05/165702470988616545.html