News

सुख्खा बन्दरगाहबाट मदिरा आयात बढ्यो

June 08, 2017

शंकर आचार्य, कान्तिपुर दैनिक, २४ जेठ २०७४

महाभूकम्पपछि वीरगन्जस्थित सिर्सिया सुख्खा बन्दरगाह नाकाबाट घटेको मदिरा तथा इनर्जी ड्रिङको आयात बिस्तारै लयमा फर्किएको छ ।

यस वर्ष उक्त नाका हुँदै तेस्रो मुलुकबाट बियर, ह्वीस्की, वाइन तथा इनर्जी ड्रिंकको आयात ह्वात्तै बढेको छ । 

बन्दरगाहस्थित भन्सार कार्यालयको तथ्यांकअनुसार चालु आर्थिक वर्षको वैशाख महिनासम्ममा १० करोड ४३ लाख रुपैयाँ भन्सार महसुल बुझाएर ४ करोड ८६ लाख रुपैयाँ बराबरको ३ लाख २० हजार २ सय ९ लिटर बियर आयात भएको छ । गत आवको यसै अवधिमा ४६ लाख रुपैयाँको बियरबाट भन्सार महसुल असुल भएको थियो । त्यसैगरी चालु आवको वैशाखसम्म १ अर्ब १ करोड रुपैयाँ भन्सार महसुल बुझाएर ६१ करोड ६६ लाख रुपैयाँ बराबरको ३ लाख ७० हजार लिटर हवीस्की आयात भएको छ । गत आवको यसै अवधिमा ५९ करोड ६१ लाख रुपैयाँ ह्वीस्कीको भन्सार शुल्क उठेको थियो ।

चालु आवको वैशाखसम्ममा ३७ करोड २६ लाख रुपैयाँ भन्सार महसुल बुझाएर १८ करोड ८२ लाख रुपैयाँ बराबरको ५ लाख ९३ हजार लिटर वाइन आयात भएको छ । गत आवको यसै अवधिमा २२ करोड ५१ लाख रुपैयाँ भन्सार शुल्क उठेको थियो । वाइन विशेषगरी अस्ट्ेरलियाबाट र थोरै चीनबाट आयात हुन्छ । त्यसैगरी चालु आवमा ४६ करोड ५० लाख रुपैयाँ भन्सार महसुल बुझाएर ८७ करोड ८१ लाख रुपैयाँ बराबरको ६६ लाख ९४ हजार लिटर विभिन्न ब्रान्डका इनर्जी ड्र्रिंकस आयात भएको छ । गत आवको यसै अवधिमा ४० करोड ६४ लाख रुपैयाँ भन्सार महसुल बुझाएको थियो । यस्ता पेय बढी मलेसिया र भियतनामबाट आयात हुन्छ । 

भन्सारका अधिकृत गणेश पौडेल भूकम्पपछि राजधानीको होटल व्यवसाय बिस्तारै लिकमा आएपछि सबैखाले मदिराको आयात बढेको बताउँछन् । मुलुकमा आयात हुने मदिराको सबैभन्दा ठूलो बजार राजधानी नै हो । यसबाहेक नेपालको सीमावर्ती भारतीय राज्य बिहारमा मदिरा प्रतिबन्धित भएपछि भारतीयहरू सीमावर्ती बजारमा आउने कारणले आयात बढेको हुन सक्ने उनको अनुमान छ । राजस्वमा योगदान गर्ने मुख्य ४ वस्तुको सूचीमा मदिरा पनि एक हो । ‘१ कन्टेनर हवीस्कीले १ करोड ५० लाखदेखि २ करोड २५ लाख रुपैयाँसम्म राजस्व दिन्छ,’ उनले भने, ‘त्यसैगरी १ कन्टेनर वाइनले ४० देखि ८० लाख रुपैयाँसम्म राजस्वमा योगदान गर्छ ।’


स्रोत: http://kantipur.ekantipur.com/news/2017-06-07/20170607092527.html