News

सूर्यमुखी खेतीमा आकर्षित हुँदै कृषक

May 22, 2017

Nagarik News, Mukti Prasad Neupane, 22nd May 2017, Palpa

 वगनाशकाली गाउँपालिका–१, चिर्तुङ्गधारा ठूलाचौरका किसानले वैकल्पिक खेतीका रुपमा सूर्यमुखी फूलको खेती गर्न थालेका छन् । उनीहरूले १० रोपनी जग्गामा सूर्यमुखी फूललाई तेल उत्पादनकालागि वैकल्पिक बालीका रुपमा प्रयोग गरेका हुन् । 

जनजागृती अगुवा कृषक समूहका अध्यक्ष पोषकान्त भण्डारी भन्छन्, ‘खेतमा पानी लगाउने समस्या हुन थालेसँगै वेकल्पिक खेतीको खोजी गरेको बताए । अहिले यहाँका प्रायः सबै किसानले सूर्यमुखी खेती गरेका छन् । फूल राम्रो फुलेकोले उत्पादन पनि राम्रो हुने आशा राखेका छौं ।’

किसानहरुलाई सूर्यमुखी खेती गर्न जिल्ला कृषि विकास कार्यालयले २० किलो विउ अनुदान उपलब्ध गराएको छ । सामाजिक श्रोत विकास केन्द्र, नेपालले ४० हजार अनुदान सहित तालिम र समूह परिचालनमा सहयोग पुर्याएको छ । सूर्यमुखीको खेती गर्न किसानहरुले ७० मीटर लामो पक्की कुलो समेत जनश्रमदानमा निर्माण गरेका छन् ।  

कृषक भण्डारीले परम्परागत खेतीबाट आम्दानी भन्दा बढी खर्च हुने देखेसँगै वैकल्पिक खेतीमा आकर्षित भएको बताए । ‘एक खेतमा ३÷४ बाली लगाउने भन्दै धान, गहुँ, मकैको खेती परम्परागत रुपमा हुन्थ्यो । लागत लाभ विश्लेषण गर्यौ । फाइदा हुने देखेर नगदेबाली र तरकारी खेती तर्फ उन्मुख भएका छा,ै’–भण्डारीले भने । 

समूहकी सदस्य शान्ति गैरे भन्छिन्,–‘समूह परिचालन राम्रो भएकै कारण विविध खेती गर्दै आएका छौं । तालिमहरु पनि हामीले पाएका छौं । अहिले परिक्षणका रुपमा सूर्यमुखी लगाएका हौं ।’
तरकारीका विउ, प्लाष्टिक टनेल, उन्नत जातका मकै र गहुका विउहरु अनुदानमा पाउदै आएको र कुनै समस्या देखापरेमा प्राविधिक सेवा लिने गरेका छौं, गैरेले भनिन् । 

तिनाउ गाउँपालिका दोभानमा सूर्यमुखीको व्यवसायीक खेती सुरु गरेका चोपलाल गिरीले सूर्यमुखीको फूल फुलेको देखेर उत्पादन हुनेमा विश्वस्त रहेको बताए । उनी भन्छन्, बुबाले लगाएको फूलमा मौरीहरु रस चुस्दै छन् । जसले मह उत्पादनमा वृद्धि हुने देखिएको छ । फूलमा मन आनन्दित समेत हुने रहेछ । 

कृषि सेवा केन्द्रका प्राविधिक सन्तोष जिसीले यसवर्ष जिल्लामा सूर्यमुखीको तेल उत्पादन हुने बताए । कृषकको माग अनुसार सूर्यमुखीको हाईब्रिट जातको किट बाँडिएको बताए । जिल्ला कृषि विकास कार्यालयका प्रमुख किशोरमान श्रेष्ठले रामपुर, वगनाशकाली, तिनाउ, रम्भा र तानसेनका विभिन्न स्थानहरुमा किसानले सूर्यमुखीको पहिलो पटक व्यवसायीक खेती सुरु गरेको बताए । उनी भन्छन्, ‘कृषकहरुलाई अनुदानमा वीउ पनि उपलब्ध गराएका छौं । प्राविधिक सेवा प्रदान गरेका छौं । यसको राम्रो उत्पादन भए जिल्लाका अन्य स्थानहरुमा पनि यसको खेती विस्तार गरिने छ । मौरी चरन र तेलको लागि वितरण बिउबाट उत्पादन राम्रो हुने देखेपछि किसानमा हौसला मिलेको छ ।’

Source: http://www.nagariknews.com/news/20462/