शंकर आचार्य, कान्तिपुर दैनिक, २६ माघ २०७४
तराईको लाइफ लाइन मानिएको हुलाकी सडक अन्तर्गत पर्साको वीरगन्जदेखि ठोरीतर्फका सडक छेउका जग्गाधनीलाई मुआब्जा वितरणको काम सुरु भएको छ ।
हुलाकी राजमार्ग आयोजना कार्यालय वीरगन्जका सूचना अधिकृत इन्जिनियर शम्भुकुमार मोचीका अनुसार वीरगन्जको पावरहाउसदेखि तिलाबे खोलासम्म करीब १० किमि सडकको मुआब्जा वितरणको काम धमाधम भइरहेको छ । ‘यो खण्डमा मुआब्जा वितरणका लागि करिब ७ करोड रुपैयाँ केन्द्रबाट निकासा आएको छ,’ उनले भने, ‘त्यसमध्ये झन्डै ५ करोड रुपैयाँ मुआब्जा बापत वितरण भइसकेको छ ।’
वीरगन्ज ठोरी हुलाकी सडक खण्डअन्तर्गत पर्ने पदम रोडमा पर्ने यो सडक खण्डमा तुलनात्मक रुपमा बढी घर, घडेरी, उद्योगधन्दा आदि भएकाले यस खण्डमा लामो समयदेखि रहेको मुआब्जा विवाद थियो । प्रमुख जिल्ला अधिकारी संयोजकत्वको समितिले मुआब्जा दर निर्धारण गरेपछि कार्यालयले मुआब्जा वितरण सुरु गरेको हो । जग्गाधनीले मुआब्जा लिन थालेपछि ठेकेदारलाई निर्वाध रूपमा काम गर्न सहज भएको छ । जिल्लाको ठोरी गाउँपालिकाअन्तर्गत सुवर्णपुरवासीसँग लामो समयदेखि लालपुर्जा नहुँदा कार्यालयलाई मुआब्जा वितरणमा समस्या हुँदै आएको थियो । पछिल्लो समय धेरै जग्गाधनीले लालपुर्जा पाएको र बाँकी पनि लालपुर्जा पाउने क्रममा रहेको मोचीले बताए ।
वीरगन्ज ठोरी हुलाकी सडक खण्डको शिलान्यास करिब १ महिनाअघि भइसकेको छ । वीरगन्जदेखि ठोरीसम्म ६० किमि लामो हुलाकी सडक निर्माणको ठेक्का २ वटा प्याकेजमा लगाइएको छ । ३०/३० किमिको प्याकेजका ठेकेदार पनि फरकफरक छन् । वीरगन्जदेखि ३० किमि सडक खण्डको ठेक्का पप्पु कन्स्ट्रक्सनसहितका कम्पनीले ज्वाइन्ट भेन्चरमा पाएका छन् । ठोरीसम्म बाँकी ३० किमि सडक निर्माणको ठेक्का कालिकासहितको ज्वाइन्ट भेन्चरका कम्पनीले पाएका छन् । भारतीय सहयोगमा निर्माण हुन लागेको यो सडक खण्डको ‘राष्ट्रिय राजमार्ग एवं अवसंरचना विकास निगम लिमिटेड’ नामक भारतीय कम्पनी कन्सल्टेन्ट हो । वीरगन्ज ठोरी सडक खण्डमा साना ठूला गरी करिब १ दर्जन पुल नेपाल सरकारले तयार गरिसकेको छ । प्राविधिक त्रुटिका कारण उति बेला निर्माण सुरु हुन नसकेका थप ४ पुलको निर्माण कार्य हाल जारी छ । योजनाअनुरूप खर्च हुन नसक्दा हुलाकी राजमार्ग आयोजना योजना कार्यालयमा वर्षेनी आउने ठूलो बजेट फिर्ता हुँदै आएको थियो ।
बारातर्फ काम सुरु
हुलाकी सडकअन्तर्गत नै वीरगन्ज–कलैया–बरियापुर सडक खण्डको निर्माण कार्य भने हाल सुरु भइसकेको इन्जिनियर मोचीले जानकारी दिए । स्वच्छन्द, पप्पु, हिम सगरमाथा ज्वाइन्ट भेन्चरका ठेकेदार रहेको यो सडक खण्ड निर्माणको लागत मूल्य अभिवृद्धि करसहित ९६ करोड ९८ लाख १२ हजार रुपैयाँ रहेको छ । यही पुस १२ गते सम्झौता गरिएको यो सडक खण्ड २०७७ असार १२ भित्र निर्माण सम्पन्न गरी सक्नुपर्छ । करिब २० किमि लामो यो सडक खण्ड दायाँबायाँ १५/१५ मिटर चौडा हुने छ । यो खण्डमा ३१ वटा पुलेसा र २६ वटा पाइप कल्भर्ट छन् ।
पर्सा र बारा जिल्लाको सदरमुकाम जोड्ने मात्र नभई ग्रामीण भेगको सदरमुकामसँग सम्पर्क जोड्ने हुलाकी सडक निर्माणको माग दुबै जिल्लाका बासिन्दाले लामो समयदेखि गर्दै आएका छन् । यो सडक निर्माण भए जिल्लाको ग्रामीण भेगसम्मको पहँुच सहज र छोटो हुने मात्र नभई ग्रामीण भेगमा उत्पादन हुने कृषि उपजले सहजै बजार पाउनेछन् । हुलाकी सडक निर्माणसँगै पर्साको ठोरी गाउँपालिकाले पर्यटन क्षेत्रमा ठूलो फड्को मार्ने सम्भावना पनि छ ।
स्रोत: www.kantipurdaily.com/pradesh-2/2018/02/09/20180209110906.html
